Samari

Ol lain politiks bilong PNG ol I wokim pasin nogut long ol pipol bilong ol. Ol nogut tingting bilong ol i mekim gutpela sindaun bilong ekonomi I go bagarap – I go daun olsem 30% 1980 inap nau.

Dispela yumi lukim insait long histori bilong PNG, taim yumi lukim insait long niupela namba I kam long PNG Nesenol Statistiks Opis (NSO) na Internesenol Moneteri Fand (IMF I bin kamap bijain long WW2 long lukautim internesonol ekonomi, PNG em I memba long IMF).

Taim 2012 I go 2017, ananit long gavman bilong Peter O’Neil, averes gutpela sindaun bilong ekonomi bilong ol manmeri PNG I bin go daun long 2.8%.

Dispela I tainim bek positiv 8.4% long taim 2000 I go 2012.

Olsem nau PNG I wok long go bek long nogut wok bilong ekonomi I bin stap long 1980’s, na  1990’s- tupela 10-yia divelopmen PNG I tromwe nating.  Tarangu.

Stat long 1980 I kamap 2017, gutpela sindaun bilong ekonomi bilong wanwan man o meri PNG I bin go daun traipela, 40.4%.

Dispela divelopmen I go bagarap olgeta.

Kontrast long dispela, ol risos sektor I kamap bikpela stret. Risos sekta em I 48.1% bikpela moa nau tede per capita, olsem long 1980. ( “per capita”, em I olsem long wanpela man o meri ).Risos sekta I kamap 62% bikpela moa long 1990’s, taim non-risos sekta I bin I go bek long 30.8%.

Taim long 2012 I go inap 2017, risos sekta I bin kamap bikpela gen long 58.1%, long taim non-risos sekta I bin go bek long 2.8%.

Divelopmen bilong PNG I save lukautim risos sekta, tasol I no save lukautim gut ol man na meri bilong PNG yet.

Treipela rong bilong PNG long taim bilong Independens inap long nau,  I bin olsem, bikpela fokas tumas I go long naturol risos (olsem LNG o gold), na liklik fokas, I no inap fokas, I go long ol gutpela gutpela pipol risos. Na tu, risos sekta (olsem main na petrol) em 16.1% tasol insait long PNG ekonomi.

Insait long dispela fokas long risos olsem main na petrol, ekonomi bilong I bin kamap olsem tupelo seperet hap, , na divelopmen benefit  I go long sampela lain tasol, I no long olgeta man na meri PNG. Na tu dispela  kain divelopmen I bin mekim Bogenvil kraisis I kamap. Dispela olgeta, ol niupela namba I kam long NSO I soim klia stret.

I luk olsem risos sekta I no save kam wantaim bikpela gutpela sindaun bilong ekonomi, olsem sampela gutpela niupela divelopmen model mas kam long PNG. Sapos yumi fokasim divelopmen long ol pipol – olsem sapotim wok long ol liklik gaden o infomal sekta- gutpela senis na benefit bai I kam long moa man na meri long PNG.

Gavman bilong O’Neill I bin sanapim wok bilong em antap long risos sekta tasol, em I bin stretim tok wantaim ol wantok na poroman bilong em yet,  na histori bilong dispel gavman tu em i mismanadgmen. Dispela I noken helpim PNG I go bek long rot bilong gutpela ekonomi. Taim ileksin I kam, PNG mas votim ol lida I betta moa.

 

Diteil

Diteil bilong rot long tingim dispela pepa I stap insait long Appendix 1. Ol diteil bilong analisis I kam daunbilo ya.

Man husait I bin raitim dispela pepa I laik tok sori long planti teknikol toktok.  Tasol ol konklusin ol I bikpela samting, olsem em I gutpela husait bai I ridim dispela pepa,  I mas klia long rot na materiol long raitim dispela pepa. Espesoli I luk olsem gavman bai I badmausim dispela analisis.

Fokas bilong dispela analisis I stap long gutpela sindaun bilong ekonomi bilong ol manmeri PNG.  Analisis I kamap long lukim long tru non-risos GDP per capita ( olsemlong wanwan man omeri)   Dispela rot, Komisin bilong Presiden bilong France, Sarkosy, I bin yusim, olsem rot I betta moa long mesarim gutpela sindaun, na I no long yusim GDP tasol.

Dispela analisis bai I yusim ol namba bilong ol akount bilong last PNG Nesenol Statistiks Opis  long 2007 I go 2014. Dispela niupela namba long GDP, ol wok long soim niupela piksa na analisis bilong  histori bilong ekonomi bilong PNG. Na tu dispela analisis bai I yusim infomesin bilong IMF ( Internesonol Moneteri Fand), ADB (AsianDivelopmen Bank) na World Bank.

Sins taim O’Neil gavman I bin ilekted , I bin I gat bikpela tanim bek long ekonomi bilong PNG.

Long taim 2000 I go 2012, gutpela sindaun bilong ekonomi I bin kamap long 8.4%. Sins niupela parlamen long 2012, I bin go bek gen. Insait long last 5 yia, gutpela ekonomik  sindaun bilong ol manmeri PNG I bin go daun long estimet 2.8%.  Tru tru go bek  I mas bikpela moa, olsem ol I soim long niupela analisis long PNG tarangu ekonomi long 2016- bikpela go daun insait long nominol , personol na GST tax koleksin,  olsem PNG tresari i soim insait  long March 2017 fainol badjet.

 

Tasol, long sem taim,  risos sekta I bin bihainim narapela rot long gutpela sindaun bilong ol manmeri PNG – olsem dispela yumi lukim  gen na gen insait long PNG histori. Risos sekta I bin go daun olsem 35.3% long yia 2000’s, tasol nau em I bin go antap gen long 58.1% long 2012 ikamap nau.

Ol namba bilong NSO wantaim IMF I soim olsem ekonomi 1980 I kami nap nau I mekim olsem:

Long taim 1980 I kam inap 2017,  gutpela sindaun bilong PNG ekonomi, em I go daun 40.4%. Treipela bagarap!  Tarangu ol manmeri PNG ol sapos long kisim moa stret, tasol nogat.  Dispela divelopmen bilong PNG, em I no olsem gutpela divelopmen bilong ol narapela kantri bilong Asia.

PNG em I gat treipela ekonomik potensol. Tasol ol nogut ekonomik polisi, bikpela korapsin, nogut lida na ol institusin I go daun , ol dispela mekim olsem potensol I no kamap tru.

Ol yia 1990s I bin taim bilong treipela ekonomik go daun, olsem 30.8% insait long yia 1990 I go inap 1999. Dispela go daun I kamap long ekonomik mismanadgmen long namel 1990’s, na stretim polisi long flotin kina insait long maket rets, na bihain ekonomik pundaun na bagarap ananit long Praim Minista Skate insait long leit  1990’s.

Tanim bilong PNG ekonomi I bin stat wantaim ol wok bilong Praim Minista Morauta long 1999.  Insait long dispela tanim I bin I gat polisi indipendens bilong Sentrol Bank, na fokas long moneteri polisi, nogat fokas long badget defisit.  Dispela tanim tu em I lukim pinis insait long nogut manadgmen bilong ol bank na superannuesin bilong PNG. Dispela tanim tu em I stat wok long makim sampela enterprais bilong PNG stat I kamap kommersol o praivet ( olsem stat bilong BSP).  Ol I bin senisim badget long kisim bek tingting na larim gavman I bekim dinau bilong gavman. Ol dispela senis I bin kamap wantaim sapot I kam long ol internesenol partna, long helpim stretim kantri PNG.

Ol dispela win I bin go bagarap gen ananit long Praim Minista O’Neill.

Gutpela sindaun bilong ol manmeri I go daun, tasol risos sekta bilong PNG I bin kamap gutpela stret. Tede em I 48% bikpela moa long tru mak bilong wanwan man na meri, olsem 1980. PNG em I kantri I gat planti gutpela naturol risos, na ol dispela risos I gutpela, olsem gavman bai I yusim long baim ol sevis olsem helt na edukesin.

Tasol risos sekta bilong PNG, teks reveniu bilong em, em I liklik moa insait long olgeta kantri . Olsem, yumi lukim olsem teks konsesin bilong LNG PNG na Ramu Nickel mekim olsem mani i go long PNG em I ananit 5%.  Husait man na meri I mas baim teks long peide bilong em, ol bai askim olsem wanem ol I mas baim teks antap moa…

Dispela fokas long risos sekta, I bin mekim olsem PNG I no fokas long narapela kain divelopmen, olsem bai I makim ol niupela wok, investmen na betta moa ekonomik sindaun. Gutpela eksempol em I olsem agrikaltja , hamas tenpela yia agrikaltja I no kisim gutpela sapot, na tu I no kisim sapot long bihainim niupela divelopmen bilong ol kantri bilong Asia. Planti kantri I gat dispela sik ol I save nemim “Dutch Disease” – dispela sik, planti kantri I gat ol gutpela risos, ol I save kisim (Ol lain ekonomi ol I save kolim dispela “sik bilong risos”, taim strongpela risos sekta I save bagarapim narapela hap bilong ekonomi).

Tasol yumi mas lukluk I go insait long PNG ekonomi, na skelim risos na non-risos wantaim . Insait niupela namba bilong NSO, hap bilong risos sekta I bin kam daun namel long hap bilong ol narapela sekta. Eksempel, niupela infomesin bilong NSO I soim olsem , long 2014, hap bilong risos sekta I bin stap long 26.6% na I go daun long 21.6%. Graf daunbilo I soim hap bilong risos sekta insait long bikpela ekonomi bilong PNG, long 1980 i kam tede. Bigpela mak bilong sekta I wok long go antap.  Yumi ken lukim sampela go daun – olsem taim ol I pasim kopa main long Bogenvil long taim bilong kraisis, na tu OkTedi I go daun, stat long nesenolaisesin long 2012.

Tasol, bikpela samting yumi lukim insait long graf, em I averes hap bilong risos sekta insait long PNG ekonomi,  em I 16.1% tasol.  Em I minim olsem, moa long 80% long nesenol ekonomi em I stap wantaim ol narapela sekta.  Liklik hap bilong PNG ekonomi tasol I stap wantaim ol risos, tasol gavman I save givim planti fokas na atensin long dispela liklik hap. Na wanem kain divelopmen I save lukautim ol manmeri betta moa, dispela kain divelopmen gavman I no save lukautim.

Insait long tupela narapela graf daunbilo , ol niupela namba bilong NSO wantaim IMF ( kain olsem indipenden referi) I soim senis long GDP na non-risos GDP long 1980 I kamap 2017.

Long sait long nominol valiu – olsem bipo long kauntim inflesin- PNG ekonomi em I go 23 taim bikpela moa ( x 23) 1980-2017, K3 billion long 1980 I go K68.7 billion long 2017 (dispela ol namba I kam long IMF tu).

Tasol, ol samting olsem bred na rais ol I bikpela mani moa nau , ol I moa ekspensiv nau insait long PNG. Averes, nau yumi baim 11kina wanem samting yumi baim 1 kina tasol long 1980.  Olgeta inflesin I bin 1,084%.

Olsem taim yumi kauntim inflesin tu, olsem “tru tru” mak bilong ekonomi em I klostu dabol (99.7%), tasol  gutpela sindaun bilong ekonomi I bin go antap long 73.7%. Tru tru, risos sekta I bin gro long 331.7%.  Graf daunbilo I soim olgeta dispela senis.

Tasol, populesin bilong PNG I bin stap long 3 million long 1980 na I kamap long estimet 8.75 million long 2017 ( olsem populesin I wok long go antap 3.1%  olsem 2011 NSO census 7.28 million I go inap nau).

Dispela em I minim olsem populesin I go antap long 190% (olsem wanpela man o meri long 1980 i kamap long 2.9 man o meri long 2017).

Populesin I go antap hariap moa long tru mak bilong ekonomi, o gutpela sindaun bilong ekonomi (99.7%).

Sapos yumi kisim tupela wantaim , I luk olsem gutpela sindaun bilong ekonomi long wanwan man o meri I bin stap long K9,866 long 1980 na i I go daun long K5,877 (ol long konstan 2016 prais) , olsem orens lain bilo I save soim.

I luk olsem go daun insait long yia 1980 I go 2016, em I 40.4%.

Dispela piksa ol namba I soim, em I nogut stret, em I soim wanpela strongpela tanim bek long olgeta win bilong ekonomi long yia 2000 I go. Em I soim yumi nidim niupela divelopmen model I moa inklusiv, olsem em bai I lukautim olgeta man na meri PNG.

Namel 5pela yia I go pinis, gavman bilong O’Neill I lukautim sait bilong risos sekta tasol, olsem ol I wokim pasin korapsin wantaim ol bisnis poro bilong ol yet, na mekim prais bilong kontrak I go antap tumas,  na mismanadgim ekonomi.

Na tu ol I bagarapim indipendens bilong Bank of PNG long sait long fainensim defisit,  kamapim treipela sot long foren exsans, pasim trensperensi insait long wok bilong gavman, na givim giaman infomesin  long ekonomi na rot bilong polisi ( olsem treipela katim o I bin wokim  insait long mani bilong helt na infrastrakta) ; na tu ol I save lukluk  long sait long Mosbi, na ol I no save lukautim ol  narapela hap bilong PNG. Wanem senis long polisi O’Neil I sadgestim long sait long divelopmen bilong liklik na medium-sais bisnis , polisi bilong graun na agrikaltja, ol dispela polisi bai I bagarapim ol posibiliti long PNG kamap bikpela insait long dispela “taim bilong Asia”.

 

Konklusin

Gavman bilong O’Neil , wok bilong ol long ekonomi na divelopmen I no inap.

Ol pipol bilong PNG – sapos ol I nogat mani inap- bai i kisim taim nogut sapos dispela ileksen I no kamapim senis long gavman.

PNG  gavman I mas kamapim gutpela tingting na polisi, kamapim gutpela institusin na wok wantaim ol pipol long nekst 4pela 10yia long kamapim divelopmen ol manmeri I gat rait long ol.

 

Post script

Mi ekspektim olsem dispela analisis, gavman bai I bagarapim, olsem I no long em I stret o nogat, tasol olsem I kam long wanpela “man nabaut” , na  man Australia tu.  Tingting bilong mi olsem, yumi olgeta I “globol citizen”, olsem yumi inap tokaut tingting bilong yumi long wanem samting I save kamap long Amerika ananit Presiden Trump, na tu olgeta globol citizen ol I ken givim tingting bilong ol long wanem samting I save kamap long ples bilong ol yet na long ol narapela ples. Em olsem wankain long mi na PNG.  PNG na ol man na meri bilong PNG mi save laikim stret sins 1978, long namba wan taim mi kam visit PNG (long hap elektoret bilong O’Neil yet).

Na tu mi klia hau tede em I hat moa long tokaut stret insait long PNG. Dispela analisis mi laik sherim olsem mi poroman stret bilong PNG, olsem mi bilip long treipela potensol bilong PNG, tasol mi lukim olsem rot bilong gavman I no helpim ol manmeri PNG.

Ol citizen bilong PNG yet bai I chusim ol lida bilong ol. Hop bilong mi, demokratik raits bilong ol, ol bai I wokim insait long fri na gutpela ileksen, na tu  infomesin ol I kisim, em I mas  gutpela na stret  infomesin